រថយន្តលុចស៊ីសបុកកុមារដើរឆ្លងថ្នល់រងរបួសធ្ងន់
01-January-2018 | ដោយ ពលមនសិការ
ពោធិ៍សាត់ ៖ មានករណីគ្រោះថ្នាក់ចរាចរណ៍មួយបានកើតឡើងដោយរថយន្តបានបុកកុមារាម្នាក់បណ្តាលឲ្យរងរបួសធ្ងន់ កាលពីថ្ងៃសៅរ៍១៣ កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនិងថ្ងៃទី៣០ ខែ ធ្នូ ឆ្នាំ ២០១៧វេលាម៉ោង ១៦ និង៣០នាទី នៅលើផ្លូវជាតិលេខ៥ ចន្លោះគីឡូម៉ែត្រ លេខ ១៦៨- ១៦៩ ស្ថិតនៅភូមិកណ្តុរស ឃុំបឹងកន្ទួត ស្រុកក្រគរ ខេត្តពោធិ៍សាត់ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាកលុចស៊ីស RX 330 ពណ៌ស ពាក់ផ្លាកលេខ ភ្នំពេញ2X-1806 ធ្វើចរាចរពីលិចទៅកើត លុះដល់ចំណុចកើតហេតុខាងលើបានបុកកុមារដើរឆ្លងថ្នល់ ពីជើងទៅត្បូងបណ្តាលឲ្យរងរបួសធ្ងន់។
មន្ត្រីនគរបាលជំនាញនៃអធិការដ្ឋាននគរបាលស្រុកក្រគរបានបញ្ជាក់ឲ្យដឹងថា អ្នកបើកបរឈ្មោះ សំ ពិសិដ្ឋ ភេទស្រី អាយុ ៣០ ឆ្នាំ ជនជាតិខ្មែរ នៅភូមិរំចេក ៤ សង្កាត់រតនៈ ក្រុងបាត់ដំបង ខេត្តបាត់ដំបង។ ជនរងគ្រោះឈ្មោះ ម៉ៅ ស្នា អាយុ ៨ ឆ្នាំ ភេទប្រុស ជនជាតិខ្មែរនៅភូមិកណ្តុរស ឃុំបឹងកន្ទួត ស្រុកគ្រគរ ខេត្តពោធិ៍សាត់។
ក្រោយពេលកើតហេតុ កុមាររងគ្រោះត្រូវបានគេបញ្ជូនទៅកាន់មន្ទីរពេទ្យខេត្តពោធិ៍សាត់ដើម្បីព្យាបាល ។ ចំពោះរថយន្តបង្កសមត្ថកិច្ចបានយកមករក្សាទុកនៅអធិការដ្ឋាននគរបាលស្រុកក្រគរ ដើម្បីដោះស្រាយតាមផ្លូវច្បាប់ ៕
ចំនួនអ្នកទស្សនា
- ថ្ងៃនេះ11141
- ម្សិលមិញ10851
- សប្តាហ៍នេះ77661
- ខែនេះ192811
- ឆ្នាំនេះ192811
- សរុប20635267